RENUNGAN MINGGUAN – 28th SUNDAY IN ORDINARY TIME YR B

POMOOGIZAN MINGGU KO-28 ID TIMPU’ TOOMOD DO TOUN B
”I KRISTUS, II PINUAVANGAN DOTOKOU”

1st Reading  : Wisdom 7 : 7 – 11
2nd Reading : Hebrew  4 : 12 – 13
Gospel : Mark 10 : 17 – 30

13.10.2024

Kopivosian tobpinaai kou ngaavi’, id minggu ko-28 tokou no id timpu’ toomod do toun B om tuhu’ nopo do sambayang dotokou diti baino nga’,”Ii Kristus, ii pinuavangan dotokou.” Id pambasaan ngaavi’ diti popoiho’ dotokou do au’ i’ ogonop do modihiu’ tokou noopo do douso’, mositi’ kumisus tokou kumaa’ doid di Jesus om balakatan tokou i’ di Tuhan do inggatus kogumu’ do kumaa’ id pomolintaan Disido’.

Tobpinaai kou ngaavi’, iisai dotokou do au’ mimang do opuavang? Saviavi’ dotokou diti, otumbazaan zou do miimang ngaavi’ do kivaa’ kobuu’o’. Nga’ pokionuon nopo di Tuhan doid  dotokou nga’ okonko’ opuavang doid nunu nopo. Ii nopo pinuavangan ii pokionuon di Tuhan doid dotokou nga’, oonok di Tuhan, iti’ no ii kotumbazaan ii apatut kivaa’ doid dotokou mooi do adadi’ tokou do ii tutumungkus di titaak Disido do Surga. Guminavo’ nopo do usin nga’ puun dotokou do mimang hasa’. Sabap no do oindamaan kozo’ momogusa’ do usin, do kohidau ii kotumbazaan dotokou. Okon nogi’ pogoduan toi’ kahasa do mogium do pinuavangan nga’ mositi’ ondomon dotokou do itia nopo pinuavangan id pomogunan nga’ okonko’ mongompusan. Agazo’ po guno’ do kabaahan mantad do pinuavangan, miaga’ di Laja Solomon  id pambasaan koiso id nomboo’ do suminambayang isido om minomihi’ isido do minonoimo’ do kabaahan mantad ko’ do pinuavangan. Iho’ no i hobi kiguno’ mantad do pinuavangan do pomogunan sabap mantad kabaahan i oimaan dotokou dii do kaanu’ tokou do pinuavangan doid surga i poinhobi mantad pinuavangan di doun pomogunan. Abaa’ tokou potoi momoguno’ diti pomuumusoou dotokou do poingkuo mimang om mintong di tavasi’ om di talaat, abaa’ do mombisala potoi miaga di laja Solomon. Miaga’ no daa’ diho’ i kavasa do maan dotokou, abaa’ doid nunu’ nopo do kaanu tokou dii do pinuavangan id surga ii hobi’ kihoogo’ mantad amas toi’ piok.

Nung pomuandaman kozo dotokou iti tobpinai kou ngaavi’, ii nopo komi’ di Jesus nga’ okonko’ pasal do kivaa’ do pinuavangan o tuhun dii, nga’,  pasal do nakagasan kozo’ do pinuavangan i tuhun dii.  Akagasan nopo do pinuavangan nga’ ii no hobi’ kohigaganan mantad do pinuavangan. Hobi’ nakagasan tokou do pinuavangan, hobi’ osusa’ tokou do papahapas dii om miaga’ kozo do noigitan tokou dii, nga’ soovon tokou no tobpinaai kou ngaavi’ do pinuavangan nopo nga’ okonko’ mongompusan. Ii nopo vagu kohigaganan nga’, pinuavangan nopo diti, kopogovit dotokou do kohiiu di Tuhan om nogi  di dovokon dotokou.  Komozon, atagakan tokou nogi do koposizon selajul sabab hobi’ tokou humansan  di pinuavangan ii au’ mongompusan, nokosuang tokou no di koposizon ii au’ otopot. Iho’ nodii do avasi’ no do monimung tokou di pinuavangan doun Surga miampai mimang tokou di koimaan ngaavi’ di tangavasi’. Hobi’ tokou do mamazada’ do pinuavangan om doiho’ no do  agazo’ ii kosivatan dotokou do kotoimo’ di vava’ doun Surga. Koposizon nopo nga’ au’ i bii’on do songkuo’ i o pinuavangan dotokou, nga’ do poingkuo tokou do momoguno’ dii. Nung opuavang tokou nga’ tuhungo’ tokou no ii tongosusa’, ii potoi  tanak ngaavi’ i  aiso’ mohoing om monuhung ngaavi’ id panambazangan. Songkuo’ nodi daa’ vinasi’ do ogumu’ ii tongopuavang id kotos om opuavang nogi do tinohuod. Miaga’ no ngaavi’ dioho’ diti ii kivaa’ do kogiiginovoo’ do otohuod do hansanon kozo’ do panambazangan do manakadai  id kavo’ do kousinan tu’ tomoimo’ o panambazangan do momoguno kozo’ do sakadai do miaga’ diti montok no do pongumbosian do panambazangan om suusuvai po kogunaan montok momogonop do koumatan ngaavi’ id panambazangan. Otumbazaan zou do ogumu’ nogi’ tuhun ii monohuod do poinhosok, au’ mimang do oihaan kozo’ do tuhun suvai, nga’ tobpinaai kou ngaavi’, koiho’ o Kinoingan do nunu’ ngaavi’ i kinovosian dotokou tu’ nokoboos Isido do onuan tokou i’ Disido do balakat do inggatus kogumu’ do id pomolintaan Disido’.

Tobpinaai kou ngaavi’, i Boos di Jesus kumaa’ doid di tuhun puavang dii nga’ ponuu’an nogi’ di Jesus doid dotokou. Nung suu’on tokou di Jesus do papadagang do halata’ toi’ kotos dotokou om ngozon no poboogizo’ doid tuhun tongosusa’, poingkuo’ tokou tobpinaai kou ngaavi’? Sanggup tokou i naku’ do mimang do ponuu’ an di Jesus diti? Mimang do avagat tobpinaii kou ngaavi’, nga’ sokuukuang do monuhung tokou no di tongosusa’ mantad di pinuavangan tokou dii’. Vookon di maan daa’ dotokou do mooi kaanu’ tokou di koposizon selajul nopo nga’, ouhi’ tokou daa’ di 10 ponuu’ di Tuhan i tinaak maza’ di Mouzus. Om mositi’ tumanud tokou di Jesus sabap Isido no ii Lahan do koposizon. Isido no ii Pidondian kavavagu’ i minikot doid pomogunan do mooi pomogonop di pidondian haid. Mositi’ tomoimo’ tokou do sumambayang doid di Jesus om tomoimo’ mambasa’ di Boos di Tuhan sabap mantad no di Boos di Tuhan do kaanu’ tokou do kabaahan do poingkuo tumanud di Jesus miaga’ i noboos id pambasaan koduvo do,  i Boos di Tuhan nopo nga’ kaanu’ popotunud om poposimban do koposizon dotokou. Miaga potoi do ontok kivaa’ kozo do kobohingkaangan toi’ opusou o pomuandaman dotokou, kinaman tokou no do mambasa’ di Boos di Tuhan, mantad doiho, kaanu’ tokou mai’ do koinggaanan do pomuandaman om sasamod ii kotinsuk kozo’ do pomusaavan dotokou om i aanu’ tokou do migit montok papapanau diti’ koposizon dotokou tu’ i Boos di Tuhan nopo nga’ poimpasi’.

Kanou nodii mogisaasambayang doid tiso om tiso do kaanu’ tokou dii do mimang ngaavi’ di tangavasi’ id mato’ do Kinoingan om kabaagi’ tokou  nodii di vava’ di Kristus do id Surga, ii pinuavangan dotokou.

Amen.

Albert M.
Paroki Penampang