RENUNGAN MINGGUAN – 29th SUNDAY IN ORDINARY TIME YR B

RENUNGAN MINGGUAN
KOPOMOOGIZAN MINGGU KO-29 TIMPU’ TOOMOD, TOUN B.

Tema do minggu diti I Kristus ii suupu minundoso di Kinoingan.

Mamalamai tokou dii Kristus ii manaak do lati doid saviavi’ koundasaan do tuhun Maza’ do minaganu do id dau’ sondii’ dii tonggungan do songuhun suupu om minonobus dotokou’ dii kinoundasaan ngaavi’ Dau. Ii tongomungkang nadadi do avakas.

Kopiondot do minggu diti , minggu do Mission Sunday, Minggu koponompuanan dotokou, minggu kapaabalan di Abal-Tavasi. Minggu kopougadan dotokou sabaagi do tanak di kinoingan i ouhi dii ponuu ngaavi dau tongobitua.

Id Abal-tavasi, noongou tokou i duvo mokiki’ia di Tuhan Jesus minokianu do pangkat, ningkokoton om kuasa. Nga’ totootopot do au’ nokoiho izioho do nunu’ o kotutukon koikoton om aantakan do koposizon di Kristus. Momuondom ii mokiki’ia di Jesus dii, do insan tadau adadi Isido do songuhun Laja toi momomolinta do tuhun Israel. Id timpu nogi dii do ii opod mokiki’ia suvai, nohodong di James om i John. Nokuo? Sasabab no do kivaa ginavo do’ oizan toi’ opipihadan do nunu ii pinokianu dioho dii.

Tobpinai ngaavi, pangkat, ningkokoton om kuasa, iti no i kogumuan do gusaon toi iman-imanon do tuhun. Ponoko’ iso tanda do kopokitanan do isai kopizo izioho om au’ nogi momoduli ingkuo lahan do momodimpot angkab dii. Aantakan iti okon noopo ko sontob poingkalaja id kopolintaan, swasta, kalaja misosondii toi mongigindapu  nga’ aantakan nogi id kopomuuanan om koponompuuanan  dotokou id panambazangan suang Paroki dotokou. Somoonu koduumak tokou tuhun di noponu do kosumbungan, aiso koinsibaan do ginavo. Kada’ daa do aantakan iti’ doid dotokou. Otumbazaan tokou do nunu ii kivaa dotokou nopo nga’ mantad titaak ngaavi di Tuhan Kinoingan.

Kopoingatan om nogi koponontudukan  di Kristus, isai noopo ii mimang do dumadi do indama’ do poingamung diozu nga’ mositi’ do suupu diozu’ om isai noopo ii dumadi do kumoiso’ do poingamung diozu’ nga’ mositi’ tudipon doid saviavi’. Ii Tuhan Jesus minikot sondii do monompuan om okon okonko’ mokitompuan.

Muot tokou dotokou sondii, pihi’ nangku dotokou do monompuan kumaa doid dovokon?

Kumoiso, vinangun tokou di Knoingan montok monompuan. Id buuk Tobitua minoboos: Vinangun tokou di Kinoingan mimang di tangavasi (Ef. 2:10). Mimang di tangavasi kumaa doid dovokon montok di Tuhan, totootopot nodaa tokou monompuan montok di Kinoingan (Mat. 25-40; 45)

Koduvo, napasi tokou montok do monompuan di Kinoingan. Miaga id pambasaan Koiso’ mantad di Profeta Isaiah. Noundoso, minatai ii Kristus id kazu salip sasabab no douso ngaavi dotokou, minonobus minomohiong do douso dotokou. I kristus, minogukab Isido do vavazaan sumuang id’ Surga. Nokoutang tokou do nyawa toi kiniopon kumaa doid di Tuhan (1Kor. 6:20).

Kumotohu, hinoou tokou do monompuan do Kinoingan tumanud di kaandak Dau. Sumuni om mazo gazo nodaa o kotumbazaan dotokou id koponompuanan dotokou sabaagi songuhun kristian Katolik.

Kaapat, sinuu tokou do monompuan do Kinoingan okon ko pihi dati dotokou, nga’ iti no lahan dotokou minsomok om popoizon di Kristus id tanga’ do koposizon om hohobi po id’ paganakan ngaavi dotokou.

Tobpinai ngaavi, kanou nodii tumaak dotokou sondii miampai monongkotohuod kumaa doid di Ama id Surga maza di tanak tontoisoon Dau ii Jesus Kristus sontob di pinataak ngaavi kumaa doid dotokou om kaanu katabazan id kopomuuanan dotokou tumanud do kaandak om ponuu’ ngaavi Disido do naamot dotokou mamaamasi id vinoun diti. Amen.

Kat. George Maison