RENUNGAN MINGGUAN – 33rd SUNDAY IN ORDINARY TIME YR B

TADAU MINGGU KO-TOHU NGOOPOD OM TOHU ID TIMPU TOOMOD TOUN B

Kopivosian Tobpinai kou ngaavi id di Kristus.

Minggu diti nopo nga Minggu Kotohu Ngoopod om Tohu id timpu toomod, mamalamai tokou do dii koponontuan touvi no id kohimpupuson do timpu. Mogovit dotokou iti do momuondom taahom-ahom do kopupuson do pomogunan, kopombisalaan touvi no om i koikatan di Kristus miampai kuasa om kobontugan Dau.

Poguhui diho koikot mai o profeta tongovudut i mogimbaazat om mogundoosi.  Tumuvong i tadau, atagakan do binabang i vuhan, umatu i tombituon om gumuzu oh tavan. Mikot nodii i Tanak do Tuhun miampai kuasa om kobontugan. Pinoingat di Kristus i Apostle Dau do sumodia tomoimo tu mikot o kohimpupuson do timpu do soosongian noopo.  Miaga di boovihan di kazu Fig kaanu daa zioho do mamalati do oonu o aantakan dumonto mongiho do osomok no o timpu koikatan di Kristus.

Id pambasaan koiso; naanu mantad buuk di Profeta Daniel, i nokosuat di 200 B.C. popoiho do koikatan di Kristus manaak do kahansanan do tuhun Johudi i ouhi om opining doid kotumbazaan doid Kinoingan om i kikahansanan do mikot mai I Tanaak do Tuhun do papahapas dioho mantad koundasaan do kopolintaan dioho. Id pambasaan koduvo; I Padri (temple priest) papataak do ii-om-ii kohubukan do tikid tadau. Au i kaanu do mongidu do douso ngaaavi. I Kristus nopo do dau sondii nga nakapapataak do insan no kohubukan do montok douso saviavi tuhun. Nokoiikau Isido doid avananan di Kinoingan do sohiihinaid. Ontok oikot o kohimpupuson do timpu mikot mai vagu ii Kristus do maganu kuasa kahantazan touvi no magaha do kotuvangan.

Aiso tuhun koiho do kaantakan diti nga ii Tatama no. Mantad no diho do kanou no sumodia tomoimo do tumoguvang do kaantakan diti miampai manaak do koponompuanan dotokou montok kaapabalan di Abal Tavasi di Kinoingan om tomoimo humansan tototoopot kumaa di Kinoingan Tama. AMEN

Sinodia Dii,

Katigis George Abel