POOMIGAZAN TADAU MINGGU’ KODUVO ID TIMPU’ TOOMOD, TOUN C
“II SANSAVO DI EKLIZIA”
Pambasaan Ko 1 : Isaiah 2:1-5
Pambasaan Ko 2 : Corinth 12:4-11
Abal Tavasi : John 2:1-11
Tobpinai ngaavi doid di Kristus,
“Umondos I Eklizia id dii Sansavo dosido ii monuzu’ mai’ dosido, umunsikou id dosido, minsiisima’ doid dosido dii taak togumu’ di Spiritu Dau’, om sihion zosido doid iso’ vinangun vagu miaga dii sinihiu Disido o vaig doid hiing-anggur.
Tobpinai kou ngaavi, onu oh pomolotian dotokou kokomoi do Panambazangan? Kokomoi nangku iho do tampat sasambayangan noopo (institution) toi ko Eklizia sinompuuvan tutumanud di Kristus ih nongopodsu?
Tadau nopo di baino nga Tadau Minggu Koduvo id Timpu Toomod Toun C. Pambasaan ngaavi di baino popoiho dotokou kokomoi do panambazangan toi ko Eklizia. Ih Abal Tavasi om pambasaan koiso mononsunud dotokou do zotokou nopo nga sabaagi do Eklizia ih sinavaan(bride) di Tuhan Jesus Kristus om ih Jesus Kristus sabaagi do sansavo do Eklizia, om ih pambasaan koduvo popoiho dotokou do Eklizia nopo nga tinimungan toi pisompuuvan do tuhun Kristian doid mogikavo-kavo lahan om taak poimbida do Spiritu Tobitua tumanud dii pihion Disido do kumaa doid dioho.
Pinopoiho ih Sangti John doid Abal Tavasi di tadau baino kokomoi do kinaantakan doid pisasavaan doid Kana id nombo do noovian izioho do tinumon hiing-anggur om nimaan di Jesus povohio ih vaig do kuminaa doid hiing-anggur tavasi mantad no do pinokianu di ina dau ih Sangti Maria.
Hobi mantad do kosunduvan, naantakan iti mooi do okito nodii ih kobontugan di Jesus om notumbazaan ngaavi ih tutumanud disido. Kosunduvan diti nopo nga ih kumoiso do pinokito di Jesus doid di mokikiia disido.
Ih Abal Tavasi ponoogi pinopoiho dotokou do ih Jesus sabaagi do sansavo (real Bridegroom) do kumaa do Eklizia Disido, ih Jesus, mantad do kinapatazon om kinotungagan Dau om kinapataakan dii Spiritu Tobitua, kinaahanan di undang-undang di Mozes kuminaa do koginavaan doid Spiritu Tobitua, Pidondian haid kuminaa doid Pidondian Kavavagu, om kotumbazaan do tuhun Johudi (Israel/Judaism) kuminaa doid kotumbazaan doid di ongotumbazaan doid dii Kristus. Saviavi iti poinhongkod ngaavi doid tinimungan do Eklizia om nogi Eklizia toniini dotokou ih paganakan dotokou sondii ih hizabon kozo doid kosimbanan.
Id pambasaan Koiso pinopoiho nogi do kokomoi do koginavaan om kobinsianan do Kinoingan kumaa do tuhun dau Israel sundung tu do obinghavan om momidouso izioho. Noboos iti do
“Kokomoi di Zion au’ zou mai’ kumodoit. Kokomoi di Jerusalem au’ zou mai’ ohumpagan, gisom do ii kovosian dosido mimang babang miaga dii sumaang-tudan om ii kopomasizan dosido umapui miaga do boubui, om pungaanan ko mai’ do ngaan vagu”
Ih hozou do kosimbaan, magahap dotokou do mambantug om sumamba do Tuhan Kinoingan, papaabal do koimazaan ngaavi di’ di Tuhan doid saviavi’ dii tuhun.
Tobpinai kou ngaavi, ponuu do Kinoingan do monuu dotokou do guminavo Disido om tumanud ngaavi do ponuu Dau om guminavo do sungkad-tukad dotokou. Iho nodii do kanou no do mogiiginavo doid tiso om tiso miampai momoguno do taak om vava do Spiritu Tobitua doid dotokou mooi do kaanu tokou nodii do monguhan om kumalaja do kalaja di pinanaak dotokou miampai doid kohudukan om koginavaan. Aiso ih do au aanu do mimang di tavasi nung poingampai no oh Kinoingan doid dotokou om magahap Disido doid sambayang om koposizon dotokou do tikid timpu.
Kotohuadan doid Kinoingan.
Kat. Nemesius Valentine
St. Michael Penampang
16th January 2025