RENUNGAN MINGGUAN – HARI MINGGU PRAPASKAH KEDUA
Kopivosian tobpinai kou ngaavi id di Kristus, minggu diti sumuuang tokou nodii doid minggu koduvo do Prapaskah. Nung mangakun tokou do otumbazaan tokou do kivaa Kinoingan, nga aiso i do koimaan tokou montok do kotumbazaan tokou, aiso do lati. Kotumbazaan nopo di pointopot nga mositi mitanud do koimaan. Mooi do okito doid koposizon tokou i kotumbazaan tokou pointopot om ogiot poinhongkod kozo doid koulalaho pogigizon tokou, mositi no do mingisom do popoundahiu tokou ii kopoposizon sondii.
Kosudong kozo doid timpu do kapagkadasan diti, do mokituhung tokou di spiritu do Kinoingan do mongumbasi kozo diti kopoposizon di nazamutan do douso. I Kinoingan tokou tomoimo poinsodia do mangampun do songkuo noopo o kinahasaan tokou. Tu i Kinoingan tokou nopo nga noponu do kobinsianan om koginavaan.
Id pambasaan koiso, id nombo i Abraham i sinuu do Kinoingan do pakaazan doid tana i nopihi Dau. Minimozo i Abraham sundung potuu do au i isido nokoiho do id noombo om okukuo o tampat ii ponuaan di Kinoingan. Nga sasabap no do agazo oh kotumbazaan Abraham doid di Kinoingan do minimozo isido. Notumbazaan isido, om pinahud do Kinoingan isido doid pamanaan dau kuminaa doid tampat di pinadandi do Kinoingan. Minonoodo o Kinoingan do pidondian miampai di Abraham. Tinuhuk ngaavi di Abraham iho. Om maza do kinopodsuan tokou, duminandi tokou doid Kinoingan do otumbazaan tokou do Kinoingan. Minangakun tokou do zadaan tokou o logon om kalaja ngaavi dau. Iti no I piondom-ondom tokou doid timpu diti kapagkadasan do monginvagu diho dandi tokou, om nung nahandai tokou doid koposizon tokou, maai tokou i pokiampunai do Kinoingan miampai do tumongob kozo kinomungkangan tokou om mooi pangakun.
Id Abal Tavasi id nombo do pinopokito i Jesus do kobontugan Dau doid dii tohu mokikiia dau. Suminihiu I Jesus do noikot pinuak di pomooson Disido.Nokoimbuhai I Moses om I Elijah om noongou dioho ohou do: Iti no I Tanak do koginavaan Ku. Nokokito izioho do kobontugan do Kinoingan doid di Kristus Jesus. Kinosasian dioho do kosunduvan di Jesus, nokogiot vagu o kotumbazaan dioho. Tobpinai kou ngaavi, pinga-ingat tokou do songian kounsoop toluai o kotumbazaan tokou tu doiho nodii mai i kotuvangan do magahung tokou.
Ingaton tokou no kozo do obohou do kololoizan om kogingahan do pomogunan, iti no mai o papaatu do kotumbazaan tokou. Kanou no pomusaavai iti kotumbazaan tuu kotumbazaan no ii kaanu papatalang mato tokou do kokito dii oonu i au okito do mato toomod nga okito miampai mato do kotumbazaan. Notuhuk di Jesus i tuddu Dau do montok koponomposian do tuhun ngaavi. Natakad Disido i Nuhu do Calvary om noivang o vavazaan do surga om nokotonduhi Dau i lahan sunsuzon kumaa id surga nokopiiso vagu o tuhun om Kinoingan.
Tobpinai kou ngaavi, id timpu do kapagkadasan diti kanou no sumambayang, mogkodos om monohuod miampai mokisokodung tokou di Spiritu Tobitua do kaanu di daa tokou humavan do kapapahad id ginavo, kohohodong om koohon nodii daa tokou doid koginavaan, kobinsianan om kohudukan dii poinponu.. AMEN
Kopomogizan Pinosodia : Kat. George Abel
