RENUNGAN MINGGUAN – HARI MINGGU PRAPASKAH KEEMPAT

RENUNGAN MINGGUAN

TADAU MINGGU KAAPAT DO KOPONOGITAN

TEMA: I Tuhan Ii Monoimo Do Momimidouso ngaavi

Pambasaan nopo do tadau baino nga poposoou do tokou di koginavaan om kosianan di Kinoingan. Poposoou do tokou do guno do mokianu do kopohiangan (forgiveness); kopiuman do kounsikaan do mogiigizon sabaagi tanak di Kinoingan. Poposoou nogi do tokou do tomoimo do guminavo do tokou i Kinoingan, au tokou i tohikudan Disido om mimang Isido do mahik tokou doid Disido songian do kaansau tokou.

Miaga di pambasaan do Gospel di tadau di baino, noonuan tokou do iso boovihan kokomoi do pogiigizon do tokou. Kivaa do duvo tanak kusai miobpinai. Minokianu i tomuhok do baagi toi halata dau om sabap no do koginavaan di ama dau do pinibaagi disido i halata dau kuminaa di duvo tanak dau. I nopo tomuhok nga minogidu doid pogun sodu om mininsuvak toi minagavi di usin om halata ngaavi dau tumanud do kaanangan dau do tonsi. Songian nopo do kaavi i usin om kotos ngaavi disido nga nokopiuman dii isido do kosusaan om houson. Kosoou dii isido do mahik doid di ama dau. Dadi tongkizadai no disido o kinoizonon dii om guhi no doid di ama dau. Kokito nopo di ama dau isido do doihuu po id sodu nga noikot no do nosianan miampai nounsikou. Panangkus no isido do minintutuk di tanak dau; gopuso om tungubai no kozo isido. Ii nopo tanak totuo nga au kotoimo di naantakan. Noikot no do nohodong isido.

Poposoou do tokou iti di koginavaan do Kinoingan. Sundung tuu do minogiduan tokou do Kinoingan nga tomoimo do toimoon tokou mahik, tomoimo do pohiongon tokou di kinahasaan do tokou. Ii nopo tanak totuo nga au kaanu do papaampun di tobpinai dau. Poposoou do tokou do songkuo ginazo do guno do mongidu di kosumbungan tokou om kohohodong ginavo.

Songian nopo do koponongkibabas tokou do Kinoingan nga adadi tokou do tuhun vagu miaga no kozo di noboos di Sangti Paul doid pambasaan koduvo. Zadaan tokou i koposizon haid. Komozon adadi tokou do tuhun kavavagu.

Kanou no mahik doid di Ama do tokou tu avasi Isido om obingginavo. Amen.

Andrew Sipajan.